img/728x90.jpg
img/728x90.jpg
காத்தான்குடி பொலிஸ் நிலைய பொறுப்பதிகாரி தெரிவுக்குழுவில் சாட்சியம்!

காத்தான்குடி பொலிஸ் நிலைய பொறுப்பதிகாரி தெரிவுக்குழுவில் சாட்சியம்!

சர்ச்சைகளுக்கு மத்தியில் கூடியுள்ள நாடாளுமன்ற தெரிவுக்குழுவில் காத்தான்குடி பொலிஸ் நிலையத்தின் பொறுப்பதிகாரி முன்னிலையாகியுள்ளார்.

தாக்குதல்கள் குறித்து ஆராயும் குறித்த குழுவில் அவர் தற்போது சாட்சியம் வழங்கி வருகிறார்.

வவுணதீவு பொலிஸார் படுகொலை மற்றும் பயங்கரவாதிகள் குறித்து காத்தான்குடி மக்களால் பொலிஸாருக்கு வழங்கப்பட்ட தகவல்கள் தொடர்பாகவும் அவர் இதன்போது சாட்சியமளிப்பாரென எதிர்பார்க்கப்படுகிறது.

ஜனாதிபதியின் எதிர்ப்பையும் மீறி தொடர்ந்தும் செயற்படும் விசாரணைக்குழு!
ஜனாதிபதி மைத்திரிபால சிறிசேனவின் எதிர்ப்பையும் மீறி செயற்பட்டு வரும் நாடாளுமன்ற தெரிவுக்குழு மீண்டும் கூடவுள்ளது.

அதன்படி அந்தக் குழுவின் ஆறாவது அமர்வு இன்று (செவ்வாய்க்கிழமை) பிற்பகல் 2 மணியளவில் ஆரம்பமாகவுள்ளது.

இன்றைய தினம் சாட்சியம் வழங்குவதற்காக காத்தான்குடி பொலிஸில் சேவையாற்றிய முன்னாள் பொறுப்பதிகாரி மற்றும் தற்போதைய பொறுப்பதிகாரி ஆகியோருடன், சுபீ முஸ்லிம் அமைப்பின் பிரதிநிதிகளும் முன்னிலையாகவுள்ளனர்.

கடந்த ஏப்ரல் மாதம் 21ஆம் திகதி இடம்பெற்ற தாக்குதல்கள் குறித்து ஆராய்வதற்காக நியமிக்கப்பட்ட நாடாளுமன்ற தெரிவுக்குழு இதுவரையில் ஐந்து தடவைகள் கூடியுள்ளது.

இதுவரை இடம்பெற்ற அமர்வுகளில் பாதுகாப்பு செயலாளர் சாந்த கோட்டேகொட, தேசிய புலனாய்வு பிரிவின் முன்னாள் தலைமை அதிகாரி சிசிர மெண்டிஸ் மற்றும் நாலக டி சில்வா, பொலிஸ்மா அதிபர் பூஜித் ஜயசுந்தர, முன்னாள் பாதுகாப்புச் செயலாளர் ஹேமசிறி பெர்னாண்டோ, முன்னாள் மேல் மாகாண ஆளுநர் அசாத் சாலி, கிழக்கு மாகாண முன்னாள் ஆளுநர் ஹிஸ்புல்லா ஆகியோரிடம் சாட்சியங்கள் பெறப்பட்டுள்ளன.

இவர்கள் வழங்கிய சாட்சியங்கள் மூலம் பல உண்மைகள் அம்பலமாகியுள்ளன. இதனையடுத்து நாடாளுமன்றத் தெரிவுக்குழுவிற்கு எதிர்ப்புகளும் வெளியிடப்பட்டன. குறிப்பாக ஜனாதிபதி மைத்திரிபால சிறிசேன தெரிவுக்குழுவின் செயற்பாடுகளை நிறுத்துமாறு கோரியிருந்தார். அத்தோடு கடந்த வாரம் இடம்பெறவிருந்த அமைச்சரவைக் கூட்டத்தையும் புறக்கணித்திருந்தார்.

எனினும் சர்ச்சைகளுக்கு மத்தியில் குறித்த குழுவின் செயற்பாடுகள் தொடர்ந்தும் இடம்பெற்று வருகின்றதோடு, இன்று அமைச்சரவையும் கூடவுள்ளமை குறிப்பிடத்தக்கது.