img/728x90.jpg
img/728x90.jpg
சம்மு காசுமீர் சிதைப்பும் தமிழ்நாட்டுக் கட்சிகளும்

சம்மு காசுமீர் சிதைப்பும் தமிழ்நாட்டுக் கட்சிகளும்

ஒரு வீதியின் வடகோடி வீட்டில் தீப்பற்றி எரிந்தால் அவ்வீதியின் தென்கோடி வீட்டில் உள்ளோர் பதறுவதைப் போல், பா.ச.க. ஆட்சி காசுமீர் மீது பற்ற வைத்த நெருப்பு தமிழர்களைப் பதறச் செய்கிறது.

1947 ஆகத்துக்கு முன் தனி நாடாக மன்னராட்சியின் கீழ் இருந்த சம்மு – காசுமீர், இந்தியா – பாக்கித்தான் பிரிவினைக்குப்பின், சில நிபந்தனைகளுடன் இந்தியாவில் இணைந்தது. காசுமீர் மன்னர் அரிசிங் 26.10.1947 அன்றும், இந்தியத் தலைமை ஆளுநர் மவுண்ட் பாட்டன் 27.10.1947 அன்றும் கையொப்பமிட்ட இரு இணைப்பு ஒப்பந்தங்களும் அந்த நிபந்தனைகளைக் கூறுகின்றன.

ஆங்கில ஏகாதிபத்தியத்தின் நேரடிக் காலனியாக இல்லாமல் அதன் மேற்பார்வையில் தனிநாடாக இருந்ததாலும், இந்து – முசுலிம் என்ற மதவேறுபாட்டு அடிப்படையில் – இந்தியா – பாக்கித்தான் என்று இரு நாடுகள் உருவாக்கப்பட்டதாலும் காசுமீர் இந்தியாவுடன் இணைவது தனி முக்கியம் பெற்றது. காசுமீர் பள்ளத்தாக்கில் 90 விழுக்காட்டினர்க்கு மேலும் சம்முவில் பெரும்பான்மையாகவும் முசுலிம்கள் இருந்ததால் – அப்பகுதிகள் பாக்கித்தானுடன் சேர்ந்து விடாமல் தன்னுடன் இணைத்துக் கொள்வதற்கு, சிறப்பாகத் தனி உரிமைகள் வழங்கிட இந்தியா முன் வந்தது.

படைத்துறை, வெளியுறவு, நாணயம், தகவல் தொடர்பு தவிர்த்த அனைத்து அதிகாரங்களும் சம்மு காசுமீர் மாநிலத்திற்கு இருக்கும் என்று அன்றையத் தலைமை அமைச்சர் பண்டித நேருவும், உள்துறை அமைச்சர் வல்லபாய் பட்டேலும் உறுதி அளித்தனர். பின்னர் அந்த உறுதிமொழிகளில் பலவற்றைக் “கண்ணைக் கொடுத்தவனே பறித்துக் கொண்டாண்டி” என்ற பட்டுக்கோட்டையாரின் பாடலைப் போல் பண்டித நேருவே பறித்துக் கொண்டார்.

எஞ்சிய சில உரிமைகளை உறுதிப்படுத்த இந்திய அரசமைப்புச் சட்ட உறுப்பு 370 உட்பிரிவுகள், உறுப்பு 35A ஆகியவற்றை சம்மு காசுமீருக்காக உருவாக்கினார்கள்.

உறுப்பு 370இன் சில உட்பிரிவுகள் மற்றும் உறுப்பு 35A இரண்டையும் நீக்கி 05.08.2019 அன்று மாநிலங்களவையிலும் மக்களவையிலும் சட்டத்திருத்தங்கள் நிறைவேற்றப்பட்டுள்ளன. இந்தத் திருத்தங்கள் சனநாயகப் படுகொலை மட்டுமல்ல, இன அடையாள அழிப்புப் பாசிசமும் ஆகும்.

இவற்றைக் கொண்டுவந்தது ஆளுங்கட்சியான பா.ச.க.! இத்திருத்தங்களை ஆதரித்து வாக்களித்த கட்சிகள் - சிவசேனை, அகாலி தளம், ஆம் ஆத்மி, பகுசன் சமாஜ் கட்சி, பிஜூ சனதா தளம், அ.தி.மு.க., சமாஜ்வாதி கட்சி, தெலுங்கு தேசம், தெலங்கானா இராஷ்டிரிய சமிதி, ஒய்.எஸ்.ஆர். காங்கிரசு முதலியவை. இத்திருத்தங்களை எதிர்த்து வாக்களித்த கட்சிகள் - காங்கிரசு, தி.மு.க., இராஷ்ட்ரிய ஜனதா தளம், சி.பி.எம்., சி.பி.ஐ., ம.தி.மு.க., விடுதலைச்சிறுத்தைகள் முதலியவை.

வாக்கெடுப்பில் கலந்து கொள்ளாமல் எதிர்த்து வெளிநடப்பு செய்து, ஒருவகை “நடுநிலை” வகித்த கட்சிகள் திரிணாமூல் காங்கிரசு, ஐக்கிய ஜனதாதளம் போன்றவை.

எதிர்த்த கட்சிகள் முழுமையாக எதிர்த்தனவா அல்லது அரைகுறையாக எதிர்த்தனவா என்பதை இப்போது பார்ப்போம்.

காங்கிரசுக் கட்சி

காங்கிரசுக் கட்சியின் தலைமை இப்படியும் அப்படியும் இருந்தாலும், அக்கட்சி சார்பில் மாநிலங்களவையில் மேற்படித் திருத்தங்களை எதிர்த்து 05.08.2019 அன்று பேசிய ப.சிதம்பரமும், குலாம் நபி ஆசாத்தும் கொதித்துப் பேசினர். திருத்தத்தின் உள்நோக்கத்தையும் அதனால் எதிர்காலத்தில் ஏற்படப்போகும் ஆபத்தையும் ப. சிதம்பரம் பேசினார்.

“இந்திய அரசமைப்புச் சட்ட வரலாற்றில் இன்றைய நாள்தான் மிக மோசமான நாள். இந்தியா – மாநில அரசுகளின் ஒன்றியம் என்ற கோட்பாடு பேராபத்தில் சிக்கியுள்ளது. இந்த ஆட்சி நீடித்தால் – இந்தியா சிதறிக் கலைந்து போவதற்கான தொடக்கமாக 370ஐத் திருத்தும் முயற்சி அமைந்து விடும்.

“அவர்கள் செய்திருப்பது அரசமைப்புச் சட்ட அட்டூழியம் (Constitutional Monstrosity). இந்தியாவின் எல்லா மாநில மக்களையும், ஒவ்வொரு குடிமகனையும் / குடிமகளையும் எச்சரிக்கிறேன். இந்தியா மாநிலங்களின் ஒன்றியம் என்பது பேராபத்தில் உள்ளது; விழித்தெழுங்கள்!

“சம்மு காசுமீரைத் துண்டாடியிருக்கும் இந்த அவலம் இந்தியாவின் எல்லா மாநிலங்களுக்கும் பரவும். இதற்கு அவர்கள் (பா.ச.க. ஆட்சியினர்) செய்ய வேண்டிய தெல்லாம் தேர்தெடுக்கப்பட்ட மாநில ஆட்சிகளைக் கலைப்பது, அங்கெல்லாம் குடியரசுத் தலைவர் ஆட்சியைக் கொண்டு வருவது – மாநில சட்டப்பேரவையின் அதிகாரத்தை நாடாளுமன்றம் எடுத்துக் கொள்வது, நாடாளுமன்றத்தில் அந்த மாநிலத்தை துண்டாடுவது பற்றிய தீர்மானம் கொண்டு வந்து நிறைவேற்றுவது என்பவையே!”

ஆனால் காங்கிரசுக் கட்சியின் உச்சத் தலைவர்களான சோனியா காந்தி 05.08.2019 அன்றும் வாய்த்திறக்கவில்லை. 06.08.2019 அன்று மக்களவையில் இந்த அழிவுத் திருத்தம் விவாதிக்கப்பட்ட போதும் வாய்த்திறக்கவில்லை. 06.08.2019 அன்று இராகுல் காந்தி – காசுமீர் சிதைப்புத் திருத்தம் இந்திய ஒற்றுமையைக் காக்காது என்ற அளவில் சுட்டுரையில் (ட்விட்டர்) விமர்சித்திருந்தார். தனி அறிக்கை விடவில்லை.

காங்கிரசின் மேல்மட்டத் தலைவர்களில் கணிசமானோர் காசுமீருக்கிருந்த சிறப்பு அதிகாரப் பிரிவுகளான 370 உட்பிரிவுகள், 35A ஆகியவற்றை பா.ச.க., ஆட்சி நீக்கியதை ஆதரிக்கிறார்கள். வெளிப்படையாக மத்தியப்பிரதேச மாநிலக் காங்கிரசுத் தலைவர் சோதிர் ஆதித்தியா மற்றும் அரியானா காங்கிரசுத் தலைவர் தீபேந்திர சிங் ஹூடா ஆகியோர் இந்தத் திருத்தங்களை ஆதரித்துப் பேசினர்.

இந்தப் பின்னணியில் காங்கிரசின் தலைமைச் செயற்குழு(காரியக் கமிட்டி)க் கூட்டம் 06.08.2019 மாலை கூடி 4 மணி நேரம் காரசாரமாக எதிரும் புதிருமான கருத்துகளை விவாதித்தது. அதில் காசுமீர் சிறப்பு நிலை நீக்கத்தை ஆதரிப்போர் எதிர்ப்போர் இடையே கடும் வாக்குவாதம் நடந்தது. இறுதியில் சமரசத் தீர்மானம் நிறைவேற்றினர். சம்மு காசுமீரில் சட்டப் பேரவை கலைக்கப்பட்டு குடியரசுத் தலைவர் ஆட்சி நடக்கும்போது ஆளுநரின் ஒப்புதலைப் பெற்றதாகக் கூறி நாடாளுமன்றத்தில் சட்டத்திருத்தங்கள் நிறைவேற்றியது சட்டப்படி தவறு என்றும், காசுமீர் மாநிலத்தை இரு ஒன்றியப் பகுதிகளாக (யூனியன் பிரதேசமாகப்) பிரித்தது தவறு என்றும் ஒருமனதாகத் தீர்மானம் நிறைவேற்றினர்.

அதாவது 370 உட்பிரிவுகள் - 35A ஆகிய அரசமைப்புச் சட்ட உறுப்புகளை நீக்கியது தவறல்ல, நீக்குவதற்கு கடைபிடித்த வழிமுறைதான் தவறு. இரண்டு யூனியன் பிரதேசங்களாக சம்மு காசுமீரைப் பிரித்தது தவறு என்று அத்தீர்மானம் கூறுகிறது.

காங்கிரசும் பா.ச.க.வும் அடிப்படையில் ஒரே இந்தியத் தேசிய – இந்துத்தேசிய – இந்திய மற்றும் பன்னாட்டு பெருங்குழும நிறுவனங்களின் ஆதரவுக் கட்சிகள்தாம் என்பதைத் தமிழ்த்தேசியப் பேரியக்கம் திரும்பத் திரும்ப கூறி வருகிறது. சம்மு காசுமீர் உரிமைப் பறிப்பு, இன அடையாள அழிப்பு ஆகிய வேலைகளில் இரண்டு கட்சிகளும் அடிப்படையில் ஒரே நிலைப்பாட்டில் தான் இருக்கின்றன.

தி.மு.க. எதிர்ப்பு

தி.மு.க. தலைவர் மு.க. ஸ்டாலின் அவர்கள் விடுத்த கண்டன அறிக்கையில் தாமும் தம் தந்தையாரும் தி.மு.க.வும் என்றென்றும் இந்தியத் தேசபக்தியில் யாருக்கும் இளைத்தவர்கள் இல்லை என்று நீண்ட பாயிரம் பாடி, பா.ச.கவிற்கு தன்னை அடையாளம் காட்டினார்.

“சீன யுத்தம், பாக்கித்தான் யுத்தம், கார்கில் போர் உள்ளிட்ட நாட்டின் பாதுகாப்பிற்கு சவால்கள் வந்தபோதெல்லாம் தி.மு.க. மத்தியில் ஆட்சியில் காங்கிரசு கட்சியா, பாரதிய சனதா கட்சியா என்றெல்லாம் பாராமல் தேசப்பற்றின் பக்கம் தீர்மானமாக நின்று அனைத்து நடவடிக்கைகளிலும் முழு ஒத்துழைப்பு வழங்கியிருக்கிறது (தி.மு.க).

“… இரண்டாவது முறையாக பொறுப்பேற்ற ஒரு சில மாதங்களுக்குள் காசுமீர் மாநிலத்தின் சிறப்புத் தகுதியை இரத்து செய்திருப்பது அதுவும் தேர்ந்தெடுக்கப்பட்ட அரசு இல்லாத நிலையில் இந்த முடிவை எடுத்திருப்பது கடும் கண்டனத்திற்குரியது. மக்களின் கவனத்தைத் திசைத் திருப்பும் முயற்சியாகவே இந்த முடிவு பார்க்கப்படுகிறது.

“…. சம்மு காசுமீரில் மக்களால் தேர்ந்தெடுக்கப்படும் அரசு அமையும் வரை குடியரசுத் தலைவரின் இந்த அறிவிப்பை நிறுத்தி வைக்க வேண்டும் என்று தி.மு.க. சார்பில் கேட்டுக் கொள்கிறேன்” (தினத்தந்தி, 06.08.2019).

மாநில சுயாட்சி கேட்பதாகக் கூறிக் கொண்ட தி.மு.க.வின் தலைவர், சம்மு காசுமீருக்கு அளித்த சிறப்புரிமைகளை நீக்கியதை தற்காலிகமாக நிறுத்தி வையுங்கள், தேர்ந்தெடுக்கப்பட்ட சட்டப்பேரவை அங்கு வந்தவுடன் அதன் கருத்தறிந்து செயல்படலாம் என்று கூறுகிறார். மற்ற மாநிலங்களையும் இதுபோல் மாற்றுவார்கள் என்ற கண்டனமோ – கூட்டாட்சிக்கு வேட்டு வைக்கப்படுகிறது என்ற குற்றச்சாட்டோ ஸ்டாலின் அறிக்கையில் இல்லை!

இதன் பொருள் என்ன? “மோடி அவர்களே, காசுமீருக்கிருந்த சிறப்பு அதிகாரங்களைப் பறித்து, அம்மாநிலத்தைப் பிளந்து, புதுதில்லி போல், அந்தமான் போல் இரண்டு யூனியன் பிரதேசங்களாக மாற்றிய தங்களின் செயலைக் கண்டிக்க வேண்டிய தர்மசங்கடத்தில் நான் இருக்கிறேன். மற்றபடி என்னைப்பற்றி தப்பான அபிப்பிராயம் நீங்கள் கொள்ள வேண்டியதில்லை. கண்டிப்பது போல் பேசி, உங்களுக்கு வலிக்காமல் அறிக்கை வெளியிட்டுள்ளேன்” என்று மறைமுகமாக ஸ்டாலின் கூறியதாகப் புரிந்து கொள்ள முடிகிறது.

இந்த இரட்டை நிலையை ஸ்டாலின் ஏன் எடுத்தார்? ஒன்று, பா.ச.க.வின் அதிகாரத்தைக் கண்டு அச்சம் அல்லது பா.ச.க.வுடன் கூட்டணி சேரத் தயார் என்று சைகை காட்டுவது!

வைகோ

ம.தி.மு.க. பொதுச் செயலாளர் அண்ணன் வைகோ அவர்கள், 05.08.2019 முற்பகல் காசுமீர் காவுத் தீர்மானத்தை அமீத்சா முன்மொழிய முனைந்தபோது சனநாயகப் படுகொலை, வெட்கம், வெட்கம் என்று முழங்கி தம் எதிர்ப்பை வெளிப்படுத்தினார். ஆனால் அதேநாளில் பிற்பகலில் மாநிலங்களவையில் நடந்த விவாதத்தில் பங்கேற்ற வைகோ, “காசுமீருக்கு வழங்கப்பட்ட சிறப்பு அதிகாரங்களை அவ்வப்போது பறித்த காங்கிரசுதான் பெரிய குற்றவாளி” என்று அதிக நேரம் காங்கிரசைத் தாக்கிப் பேசினார்.

காங்கிரசு நடத்திய உரிமைப் பறிப்பை கண்டனம் செய்வது தேவை. ஆனால், காசுமீரின் எல்லா உரிமைகளையும் பறிக்கும் பா.ச.க.வின் முன்மொழிவு வாக்கெடுப்புக்கு வரும் நேரத்தில் பா.ச.க.வை குறைவாக விமர்சித்து, காங்கிரசை மிகையாக விமர்சிப்பதுதான் சிக்கல்!

“இந்திய சனநாயக வரலாற்றில் இந்த நாள் இரத்தக் கண்ணீர் வடிக்கச் செய்த நாள். சனநாயகம் படுகொலை செய்யப்பட்ட நாள்; காசுமீர் மக்களின் முதுகில் குத்திய நாள் பா.ச.க. இன்று கொண்டு வந்துள்ள சட்ட முன்வரைவு, காசுமீர் மக்கள் நெஞ்சில் நெருப்கைக் கொட்டிவிட்டது.…… இந்த மசோதாவைக் கடுமையாக எதிர்க்கிறேன்” என்றார் வைகோ.

ஆனால் இப்பேச்சுக்கிடையே மோடி ஆட்சிக்கு அன்பான அறிவுரைகளை வழங்கினார். “இந்தியாவைச் சுற்றிப் பகை சக்திகள் நேரம் பார்த்துக் காத்திருக்கின்றன. காசுமீரின் ஒரு பக்கம் பாக்கித்தான் - அங்கு அல்கொய்தா! அடுத்த பக்கம் ஆப்கானித்தான் – அங்கு தாலிபான்கள்; இன்னொரு பக்கம் நம் மீது வெறுப்புக் கொண்டிருக்கும் செஞ்சீனா – தருணம் பார்த்துக் கொண்டிருக்கின்றன. இனிமேல் காசுமீர் சிக்கல் இந்தியாவின் உள்நாட்டுச் சிக்கலாக இருக்காது.

“அமெரிக்கக் குடியரசுத் தலைவர் டொனால்டு டிரம்ப் திறமையான குள்ள நரி. கிழக்குத் திமோரைப் பிரித்து தனி நாடாக்கியது போல், கொசோவாவைப் பிரித்துத் தனி நாடாக்கியது போல், தெற்கு சூடானைப் பிரித்துத் தனி நாடாக்கியது போல், காசுமீரையும் பயன்படுத்துவார்கள். காசுமீர் சிக்கலை பன்னாட்டுச் சிக்கல் ஆக்குவார்கள். ஐ.நா. மன்றமும், ஐ.நா.வின் மனித உரிமை மன்றமும் இதில் தலையிடும்” என்றார் வைகோ!

இந்தோனேசியாவிலிருந்து கிழக்குத் திமோர் பிரிந்ததை ஆதரித்துப் பல கூட்டங்களில் பேசியவர் வைகோ அவர்கள். கிழக்குத் திமோர் விடுதலைக்குப் பன்னாட்டு மேற்பார்வையில் 1999இல் கருத்து வாக்கெடுப்பு நடந்தது. அதேபோல் தமிழீழத்தில் கருத்து வாக்கெடுப்பு நடத்த வேண்டும் என்று பேசினார். கொடிய இன ஒடுக்குமுறைகளை எதிர்த்துப் போர் நடத்தி விடுதலை அடைந்த நாடுகள் கொசோவாவும் தெற்கு சூடானும். அவற்றின் விடுதலை ஏகாதிபத்தியத்தின் சூழ்ச்சி என்று கூறினால், தமிழீழ விடுதலைக்கு அமெரிக்காவின் தலையீட்டைக் கோரினாரே அண்ணன் வைகோ அது எப்படி சரியாகும்?

தி.மு.க. தலைவர் ஸ்டாலின் ஆவேசமின்றி பாரதமாதா பக்தியை வெளிப்படுத்தி அறிக்கை வெளியிட்டார். அதே பணியை ஆவேசச் சொற்பொழிவு மூலம் அண்ணன் வைகோ வெளிப்படுத்தியுள்ளார். பா.ச.க. ஆட்சி இதர மாநிலங்களையும், துண்டு துண்டாக்கி யூனியன் பிரதேசங்களாக மாற்றும் அபாயம் ஏற்பட்டிருப்பதை சுட்டிக்காட்டி எச்சரிக்கவில்லை வைகோ அவர்கள்!

செயலலிதா

செயலலிதா அம்மையார் 1984ஆம் ஆண்டு மாநிலங்களவையில் பேசும்போது சம்மு காசுமீருக்கு சிறப்புரிமைகள் வழங்கும் உறுப்புகள் 370 உட்பிரிவுகள் - 35A ஆகியவற்றை நீக்க வேண்டும் என்று வலியுறுத்தியுள்ளார். அப்பேச்சை இப்போது எடுத்துப்போட்டு, நாங்களும் அம்மா வழியில்தான் 370, 35A நீக்கத்தை ஆதரிக்கிறோம். என்று கூறுகிறது எடப்பாடி – ஓ.பி.எஸ். அ.தி.மு.க.!

தமிழ்த்தேசியப் பேரியக்கம் அம்மையாரின் அரசியல் குறித்து அவர் ஆட்சியில் இருந்த காலங்களில் திறனாய்வு செய்துள்ளது. அவருக்கு தமிழ் மொழியின் மீது, தமிழ் இனத்தின் மீது, காழ்ப்புணர்ச்சி உண்டு; அதை வெளிக்காட்டிக் கொள்ள மாட்டார். செயலில் காட்டுவார். தமிழ்நாட்டுச் சூழலுக்கேற்ப தமிழ் ஆதரவுக் கருத்துகளைப் பேசி வந்தார். பா.ச.க.வினர் அயோத்தியில் பாபர் மசூதியை இடித்தபோது, அந்த “கரசேவை”யில் பங்கேற்பதற்காக தன் “தொண்டர்களை” அனுப்பி வைத்தார். அவர் ஆரியத்துவா ஆதரவாளர்; தீவிரமான இந்தியத் தேசியவாதி; அவர் மாநில சுயாட்சி கோர மாட்டார் என்று நாம் கூறிவந்தோம். நம் கூற்று சரியான திறனாய்வு என்பதற்கு எடுத்துக்காட்டுதான் அவர் ஆட்சியில் இல்லாத காலத்தில் - 1984இல் 370, 35A உறுப்புகளை நீக்க வலியுறுத்தி நாடாளுமன்றத்தில் பேசியது.

மருத்துவர் இராமதாசு

அன்றாடம் அனைத்திந்தியச் சிக்கலில் இருந்து அரியலூர் சிக்கல் வரை அறிக்கை வெளியிடும் பா.ம.க. நிறுவனர் மருத்துவர் இராமதாசு அவர்கள், சம்மு காசுமீர் மாநிலம் பிரிக்கப்பட்டு யூனியன் பிரதேசங்களாக மாற்றப்பட்டதையும் அதற்கு வழங்கப்பட்ட சிறப்புரிமைகள் பறிக்கப்பட்டதையும் பற்றி ஒரு கருத்தும் வெளியிடவில்லையே, ஏன்?

பா.ச.க.வுடன் உள்ள கூட்டணிக்காக – பதுங்கிக் கொண்டார் மருத்துவர் என்று சொல்ல முடியாது. கூட்டணியில் இருந்தாலும் விமர்சனம் செய்யக் கூடியவர்தாம்! தமிழ்நாட்டை மூன்றாகப் பிளக்க வேண்டும் என்ற பா.ம.க.வின் கோரிக்கைக்கு முன்னோட்டமாக சம்மு - காசுமீர் பிரிப்பு இருக்கிறது என்று தெம்பு பெற்றிருப்பார் மருத்துவர் இராமதாசு.

தமிழ்நாட்டை மூன்றாகப் பிரித்து, அதில் ஒரு யூனியன் பிரதேசத்துக்கு அன்புமணி இராமதாசு முதல்வர் பதவியைப் பிடித்தால் தமது இலட்சியம் நிறைவேறிவிடும் என்று இராமதாசு கருதுகிறார்.

தமிழ்நாடு பிளக்கப்படுவதைத் தடுக்க

தமிழ்நாட்டை வட தமிழ்நாடு, தென் தமிழ்நாடு, கொங்கு நாடு என மூன்றாகப் பிரிக்க வேண்டும் என்று ஏற்கெனவே தன்னலவாத சாதி அமைப்புகள் கோரிக்கை வைத்துள்ளன. ஒரு வேட்டியை மூன்றாகக் கிழித்தால் மூன்று வேட்டிகள் கிடைக்காது. மூன்று துண்டுத் துணிகள் தான் மிஞ்சும்!

ஒன்றுபட்ட தமிழ்நாடாக இருக்கும்போதே இங்கு இந்திய அரசு வேலைகளில் 95 விழுக்காடு இந்திக்காரர்களையும் வெளி மாநிலத்தவர்களையும் சேர்க்கிறார்கள். அன்றாடம் ஆயிரம் பல்லாயிரமாய் வந்து வெளிமாநிலத்தவர்கள் பட்டணம் தொடங்கி பட்டிக்காடு வரை குடியேறி வருகின்றனர்.

தமிழ்நாட்டிற்குரிய வரிவசூல், கல்வி, மருத்துவம், நீதித்துறை, நெடுஞ்சாலைத்துறை, காவல்துறை உள்ளிட்ட அனைத்துத் துறைகளையும் அடுத்தடுத்து பறித்து வருகிறது. இந்திய அரசு. மூன்று யூனியன் பிரதேசங்களாகத் தமிழ்நாடு மாற்றப்பட்டால், புதுச்சேரியின் கிரேன்பேடி போல் இந்திக்காரர்கள் தாம் தமிழ்நாட்டை ஆள்வார்கள்.

“எவ்வளவு குறைத்துக் கொண்டாலும் எனக்கொரு கங்காணி அதிகாரம் கொடு” என்று கையேந்தும் இந்தத் தேர்தல் கட்சிகள், இந்திய ஏகாதிபத்திய ஆதிக்கவாதிகளுக்கு ஆதரவாகத்தான் செயல்படும் என்பது கடந்தகால - நிகழ்கால உண்மைகள்!

தமிழ்நாட்டுக்கு வந்துள்ள பேராபத்தைத் தடுக்க வேண்டுமெனில் கங்காணிப் பதவிகளுக்காக இனத்தைக் காட்டிக் கொடுக்காத இலட்சியத் தமிழ்த்தேசியம் இங்கு வளர்ந்தாக வேண்டும்; வெகுமக்கள் அதை நோக்கி வர வேண்டும். அதற்குண்டான வேலைகளை இளந்தலைமுறையினர் செய்ய வேண்டும்.

காங்கிரசு மற்றும் பா.ச.க.வுடன் மாறிமாறிக் கூட்டணி சேர்ந்த, சம்மு காசுமீரின் தேசிய மாநாட்டுக் கட்சி - மக்கள் சனநாயகக் கட்சி ஆகியவை, இந்திய ஏகாதிபத்தியவாதிகளின் திருவிளையாடல்களுக்குக் காசுமீரின் கதவைத் திறந்து விட்டவை; அதற்குக் காரணம் கங்காணிப் பதவி அரசியல்! அவ்விருக் கட்சிகளைப் போன்றவைதாம் தி.மு.க.வும், அ.தி.மு.க.வும். குட்டி தி.மு.க., குட்டி அ.தி.மு.க. போன்று மற்றும் சில கட்சிகள் இங்கிருக்கின்றன.

சம்மு காசுமீரை இந்தக் கதிக்குக் கொண்டு வந்துவிட்டவர்கள் யார் என்று அம்மக்களே கூறுவதைக் கேளுங்கள்! சம்முவில் ஒரு பள்ளி ஆசிரியர் கூறினார். “இந்தக் கதிக்கு சம்மு காசுமீர் ஆளானதற்குக் காரணம் முக்கியமான மாநில கட்சிகள்தான்”! (THE HINDU – 06.08.2019, முதல் பக்கம் எட்டாவது காலம்). விழித்தெழுவீர் தமிழர்களே!

தமிழ்த்தேசிப் பேரியக்கத் தலைவர்
ஐயா பெ. மணியரசன்